Skilmálar

Útgáfa 0.1 (beta) · Gilda frá 6. október 2026

Þessir skilmálar gilda um notkun á Kassify. Með því að stofna aðgang eða nota þjónustuna samþykkir þú skilmálana fyrir hönd fyrirtækisins sem þú skráir. Þú staðfestir jafnframt að þú hafir heimild til að skuldbinda það.

1. Aðilar

Þjónustuna veitir Kassify ehf., kt. 461026-0520, Hlíðasmára 6, 201 Kópavogi („Kassify“, „við“).

Viðsemjandi okkar er fyrirtækið eða einstaklingurinn í rekstri sem skráð er í Kassify („viðskiptavinur“). Notendur eru þeir sem viðskiptavinur veitir aðgang, til dæmis starfsfólk og bókarar.

Reikningar fyrir áskrift eru fyrst um sinn gefnir út af Airplane Mode, LLC (Delaware, Bandaríkjunum) fyrir hönd Kassify ehf. Kassify ehf. ber áfram ábyrgð á þjónustunni gagnvart viðskiptavini.

2. Þjónustan

Kassify er bókhaldskerfi á netinu fyrir íslensk fyrirtæki. Í því er meðal annars hægt að færa bókhald, tengja banka, taka á móti og lesa fylgiskjöl, gefa út sölureikninga, reikna laun, senda launaseðla og skilagreinar og nota gervigreind við flokkun og spjall.

Þjónustan er eingöngu ætluð fyrirtækjum og einstaklingum í atvinnurekstri, ekki neytendum.

3. Beta-útgáfa

Kassify er í beta-prófun. Það þýðir að:

• þjónustan er enn í þróun og eiginleikar geta breyst, bæst við eða fallið brott,
• villur geta komið upp og þjónustan getur legið niðri án fyrirvara,
• engin trygging er um uppitíma eða viðbragðstíma (ekkert þjónustustig),
• við biðjum um ábendingar og getum haft samband við notendur til að fá álit þeirra.

Viðskiptavinur á að yfirfara bókhald sitt og ekki treysta eingöngu á Kassify á meðan á beta-prófun stendur. Við mælum með að hann taki reglulega út gögn sín.

4. Prufutímabil

Nýir viðskiptavinir fá 30 daga ókeypis prufutímabil frá stofnun aðgangs. Ekkert er innheimt á prufutímabilinu og ekki þarf að skrá greiðslukort.

Fyrir lok prufutímabilsins látum við vita hvað áskrift kostar. Viðskiptavinur velur sjálfur hvort hann heldur áfram í greiddri áskrift. Ef hann gerir það ekki lokast fyrir skráningu nýrra gagna, en hann getur áfram skoðað og tekið út gögn sín eins og lýst er í 11. kafla.

5. Aðgangur og öryggi

• Viðskiptavinur ber ábyrgð á því hverjum hann veitir aðgang og hvaða hlutverk þeir fá.
• Notendur skulu halda innskráningarupplýsingum leyndum og láta okkur strax vita ef grunur er um misnotkun.
• Viðskiptavinur ber ábyrgð á öllu sem gert er í hans nafni, þar á meðal með API-lyklum og gervigreindaraðstoðarmönnum sem notendur tengja.

6. Leyfileg notkun

Óheimilt er að:

• nota Kassify í ólögmætum tilgangi, þar á meðal til peningaþvættis, skattsvika eða til að falsa bókhald,
• reyna að komast í gögn annarra viðskiptavina eða fram hjá öryggisráðstöfunum,
• leggja óeðlilegt álag á kerfið, afrita það eða endurselja án skriflegs samþykkis okkar,
• setja inn efni sem brýtur gegn réttindum annarra eða inniheldur spilliforrit.

Við getum lokað aðgangi tímabundið ef notkun brýtur gegn þessu. Við látum viðskiptavin vita eins fljótt og hægt er.

7. Ábyrgð á bókhaldi

Kassify er verkfæri. Viðskiptavinur ber áfram fulla ábyrgð á bókhaldi sínu, skattskilum, launagreiðslum, ársreikningi og öðrum skyldum samkvæmt lögum, meðal annars lögum nr. 145/1994 um bókhald og reglugerð nr. 505/2013 um rafrænt bókhald.

• Við veitum ekki bókhalds-, skatta- eða lögfræðiráðgjöf. Tillögur, útreikningar og sniðmát í Kassify koma ekki í stað sérfræðiráðgjafar.
• Viðskiptavinur skal yfirfara færslur, launaútreikninga og skýrslur áður en hann sendir þær frá sér eða skilar þeim til stjórnvalda.
• Kassify hefur ekki aðgang að þjónustusíðu Skattsins fyrir hönd viðskiptavinar. Notandi skilar sjálfur virðisaukaskatts- og staðgreiðsluskýrslum.

8. Gervigreind og sjálfvirkni

Kassify notar gervigreind til að lesa skjöl, flokka færslur og svara spurningum. Gervigreind getur gert mistök.

• Niðurstöður gervigreindar eru tillögur. Notandi ber ábyrgð á að yfirfara þær.
• Ef sjálfvirk bókun verður í boði og viðskiptavinur kveikir á henni bókast færslur án þess að notandi samþykki hverja og eina. Þær verða merktar sem sjálfvirkar og hægt verður að leiðrétta þær.
• Notandi sem tengir eigin gervigreindaraðstoðarmann við Kassify samþykkir sérstakan texta um það í stillingum og ber ábyrgð á aðgerðum aðstoðarmannsins.

9. Tengingar við þriðju aðila

Í Kassify er hægt að tengjast þjónustu þriðju aðila, til dæmis bönkum í gegnum Enable Banking, skilagrein.is, Payday og dk. Um þá þjónustu gilda skilmálar viðkomandi aðila. Við berum ekki ábyrgð á þjónustu þriðju aðila, rangindum í gögnum frá þeim eða því að tenging rofni.

10. Gögn viðskiptavinar og persónuvernd

• Viðskiptavinur á þau gögn sem hann setur í Kassify. Hann veitir okkur heimild til að vinna þau eins og þarf til að veita þjónustuna.
• Um vinnslu persónuupplýsinga sem viðskiptavinur setur inn gildir vinnslusamningur Kassify, sem er hluti af þessum skilmálum. Þar er Kassify vinnsluaðili og viðskiptavinur ábyrgðaraðili.
• Um vinnslu okkar sem ábyrgðaraðila gildir persónuverndarstefna Kassify (kassify.is/personuvernd).
• Við megum nota ópersónugreinanlegar, samantektar upplýsingar um notkun til að bæta þjónustuna. Við notum ekki gögn viðskiptavinar til að þjálfa gervigreindarlíkön þriðju aðila.

11. Varðveisla, útflutningur og lok samnings

• Viðskiptavinur getur hvenær sem er tekið út bókhald sitt og fylgiskjöl úr Kassify.
• Bókhaldslög skylda viðskiptavin til að varðveita bókhaldsgögn í 7 ár frá lokum reikningsárs. Það er á ábyrgð viðskiptavinar að taka gögnin út og varðveita þau þegar hann hættir að nota Kassify.
• Þegar samningi lýkur hefur viðskiptavinur 90 daga til að taka út gögn sín. Að þeim tíma liðnum eyðum við gögnunum, nema viðskiptavinur hafi samið við okkur um að geyma þau lengur eða lög skyldi okkur til að geyma þau. Gögnum er eytt úr afritum þegar geymslutíma afritanna lýkur.

12. Verð og greiðslur

• Verð er birt á vef Kassify eða tilkynnt viðskiptavini áður en greidd áskrift hefst.
• Verð er án virðisaukaskatts nema annað sé tekið fram.
• Áskrift er greidd fyrir fram fyrir hvert áskriftartímabil og endurnýjast sjálfkrafa þar til henni er sagt upp.
• Við tilkynnum verðbreytingar með minnst 30 daga fyrirvara.

13. Hugverkaréttindi

Kassify og allt sem því fylgir (hugbúnaður, hönnun, texti og vörumerki) er eign Kassify ehf. eða leyfisveitenda þess. Viðskiptavinur fær óframseljanlegan rétt til að nota þjónustuna á meðan samningur er í gildi. Ábendingar sem viðskiptavinur sendir okkur megum við nýta án endurgjalds.

14. Takmörkun ábyrgðar

• Þjónustan er veitt eins og hún er („as is“), sérstaklega á meðan á beta-prófun stendur.
• Kassify ber ekki ábyrgð á óbeinu tjóni, svo sem rekstrartapi, glötuðum hagnaði, sektum eða álagi stjórnvalda, eða tjóni vegna rangra upplýsinga sem viðskiptavinur eða þriðju aðilar leggja til.
• Bótaábyrgð Kassify vegna hvers konar tjóns er takmörkuð við þá fjárhæð sem viðskiptavinur hefur greitt fyrir þjónustuna síðustu 12 mánuði áður en tjónið varð. Á prufutímabili er hún takmörkuð við 50.000 kr.
• Takmarkanirnar gilda ekki um tjón sem valdið er af ásetningi eða stórfelldu gáleysi, né þar sem lög banna slíka takmörkun.

15. Trúnaður

Aðilar skulu gæta trúnaðar um upplýsingar sem þeir fá um hvorn annan og ekki nota þær í öðrum tilgangi en samningnum. Trúnaðarskyldan gildir áfram eftir að samningi lýkur.

16. Uppsögn

• Viðskiptavinur getur sagt upp áskrift hvenær sem er með tölvupósti á support@kassify.is. Uppsögn tekur gildi við lok yfirstandandi áskriftartímabils. Ekki er endurgreitt fyrir hluta tímabils.
• Kassify getur sagt samningi upp með 30 daga fyrirvara. Við getum rift honum strax ef viðskiptavinur brýtur gróflega gegn skilmálunum eða greiðir ekki þrátt fyrir áminningu.
• Ef Kassify hættir að bjóða þjónustuna látum við vita með minnst 90 daga fyrirvara svo viðskiptavinir geti tekið út gögn sín.

17. Breytingar á skilmálum

Við getum breytt skilmálunum. Verulegar breytingar tilkynnum við með minnst 30 daga fyrirvara með tölvupósti eða í kerfinu. Ef viðskiptavinur vill ekki una breytingunum getur hann sagt upp áður en þær taka gildi.

18. Lög og varnarþing

Um skilmálana gilda íslensk lög. Ágreiningi sem ekki tekst að leysa með samkomulagi má reka fyrir Héraðsdómi Reykjaness.

19. Samband

Kassify ehf., kt. 461026-0520, Hlíðasmára 6, 201 Kópavogi. Netfang: support@kassify.is.